‘दुखी आत्मा’ को मिरुना होइन आँचल हिरोइन

काठमाडौं,१५ माघ ।
निर्देशक दीपेन्द्र लामा र निर्माता हिमाल कडरियाले ‘नाङ्गो गाउँ’ को सफलता लगत्तै आफूहरुको नयाँ फिल्म ‘दुखी आत्मा’ हुने घोषणा गरेका थिए । दयाहाङ राईलाई प्रमुख भूमिकामा लिएर घोषणा गरिएको ‘दुखी आत्मा’ मा हिरोइन मिरुना मगर नै हुन् भनेर कतिपयले ठोकुवा समेत गरेका थिए । स्वभाविक आँकलन हो–पछिल्लो समय दयाहाङ र मिरुनाको जोडी चल्नू । तथा, ‘नाङ्गो गाउँ’ को सफलतासँगै यही टिमले लगभग सबै कलाकार,प्राबिधिक दोहोर्याएर ‘नाङ्गो गाउँ–२’ निर्माण गर्ने घोषणा गर्नू । दयाहाङ र मिरुना अभिनीत ‘जारी’ र ‘नाङ्गो गाउँ’ सफल भएपछि अधिकांश निर्माताले जोडीलाई दोहोर्याइरहेका छन । त्यसकारण पनि ‘दुखी आत्मा’ मा पनि मिरुना नै हुन्छिन् भन्ने बिश्वास गरी केही मिडियामा त न्युज पनि आयो ।
तर,‘दुखी आत्मा’ को हिरोइन्मा निर्माण युनीटले आँचल शर्मालाई अनुबन्धित गरेको छ । ‘पटकथाको मागअनुसार कलाकार चयन गरिन्छ,’ निर्देशक दीपेन्द्र लामाको भनाइ छ, ‘मान्छेहरुको अनुमान स्वभावीक हो । तर मुख्य कुरा त कथाको माग नै हो ।’ पछिल्लो समय आँचलको हातमा लगालग फिल्मनै फिल्म छन् । भर्खरै ‘डिग्री माइला’ को सुटिङ सकाएकी आँचल र दयाहाङ दोश्रोपटक ‘दुखी आत्मा’ मा सँगै अभिनय गर्दैछन् । हिमाल कडरिया निर्माता रहेको ‘दुखी आत्मा’ पछि निर्देशक दीपेन्द्रसँग उनले ‘नाङ्गो गाउँ–२’ निर्माण गर्ने घोषणा गरिसकेको छन । चैत्रबाट सुटिङ थालिने ‘दुखी आत्मा’ को हाल स्क्रिप्ट लेखन कार्य अन्तिम चरणमा पुगेको जानकारी निर्देशक दीपेन्द्रले दिएका छन् । सोसियल कमेडी जनराको फिल्मलाई आरआर फिल्मस्ले देशब्यापी बितरण गर्नेछ ।
०००