निर्देशक बोहराको ‘चमेलीको पोइ’ को गीत रेकर्डिङमै झुमे सबै

काठमाडौं ।  
निर्देशक,निर्माता,गीतकार तथा समाजसेवी एभरेष्ट सूर्य बोहराले निर्माण गर्ने नयाँ फिल्म ‘चमेलीको पोइ’ को ‘ओइ चमेली ओइ चमेली तम्रो शेरे खोइ..’ बोलको कमेडी शैलीको गीत रेकर्डिङ सम्पन्न भएको छ । निर्देशक बोहराकै शब्द, राजनराज शिवाकोटीको संगीत अनि इन्दिरा जोशी र राजनराजको स्वर रहेको गीत रेकर्डिङकै बेलामा स्टुडियोका प्राबिधिकहरुलाई झुमाएको थियो ।

‘रेकर्डिङका लागि म्युजिक बज्न थालेपछि स्टुडियो उपस्थित सबै,एरेञ्जर,बाद्यबाधक,प्राबिधिक,कर्मचारीहरु समेत नाच्न थालिहाले’ निर्देशक बोहराले सुनाए,‘गीत सबैले मन पराए । केही बेर रेकर्डिङ अबरुद्ध भयो । स्टुडियो त एकाएक क्लवमा परिणत भयो नि ! रेकर्डिङकै बेलाको यस प्रकारको माहौल हेर्दा लाग्छ, यो राजनराजको कुटुमा कुटुपछिको अर्काे बम्पर हिट गीत हुनेछ ।’

निर्देशक बोहराका यसअघिका फिल्म–‘अग्नी परिक्षा’ को ‘हाम्लाई पनि मायाले हेर पार्वती..’, ‘ठूली’ फिल्मको ‘म त मर्छु की क्या हो ठूली..’, ‘भैरे’ फिल्मको ‘सनम माया ला’को’, ‘सान्नानीलाई भेट्न आउँदा..’ लगायतका गीत सुपरहिट भएका थिए । ‘चमेलीको पोइ’ को यो गीत पनि आम स्रोता दर्शकले अधिक मन पराउने बिश्वास उनको छ ।

कोरोना कालमा चलचित्र प्राबिधिकहरुको सहयोगार्थ सुरक्षित तवरले जम्मा ७२ घण्टाको सुटिङमा ‘श्री’ फिल्म निर्माण गरेर तारिफ पाएका बोहरा फिल्म निर्माणका साथै कसैलाई समस्या पर्दा सहयोग गर्न अग्रपंक्तिमा उभिइहाल्छन् । उनले निर्देशन गरेको सस्पेन्स लभस्टोरी फिल्म ‘हेलो जिन्दगी’ ले थुप्रै बिदेशी फेष्टिभलमा अवार्ड जितेको थियो ।
कमर्शीयलका साथै आर्ट फ्लेभरका फिल्म निर्माण गर्न सिपालु बोहरा ‘चमेलीको पोइ’ कमेडी शैलीको यथार्थपरक कथामा निर्माण गर्न लागीएको बताउछन् । जेठमा सुटिङ गर्ने लक्ष्य लिइएको यो फिल्मबाट पुराना चर्चित हाँस्य कलाकार नारायण त्रिपाठीले लामो समयको अन्तरालपछि ठूलो पर्दामा ‘कमब्याक’ गर्दैछन् । फिल्मका अन्य कलाकार,प्राबिधिक छिट्टै टुंगो लगाइने निर्देशक बोहरा बताउँछन् ।