दुई प्रदिपको फिल्मको नाम – `एक्लो-१´,सुटिङका लागि बनाइदैछ रकेट

काठमाडौं ।

निर्देशक प्रदिप शाहीको निर्देशनमा अभिनेता प्रदिप खड्का प्रमुख भुमिकामा रहेको साईफाई-जोम्बी थ्रिलर फिल्मको नाम `एक्लो-१´ राखिएको छ । निर्माण पक्षले सोमबार फिल्मको थिम पोस्टरसहित फाइनल नाम घोषणा गरेको हो । निर्देशक शाहीले फिल्म ट्राइलोजी (तीन भाग) मा निर्माण हुने बताएका छन ।

थिम पोस्टर हेर्दा फिल्म अहिले बनिरहेका मध्य फरक बिषय र प्रस्तुतिको हुने अनुमान गर्न सकिन्छ । सार्वजनीक पोस्टरमा स्पेससुट लगाएका पात्रको मुहार स्पष्ट नभए पनि उनी हिरो प्रदिप खड्का रहेको अनुमान गर्न गाह्रो पर्दैन । फिल्ममा प्रदिपसंगै वेनिशा हमाल,विजय लामा, दीया पुन, कविता नेपाली, एवनराज उप्रेती तथा सुनिल थापाको अभिनय रहनेछ।

शाइ प्रोडक्सन नेपालको ब्यानरमा निर्माण हुने फिल्ममा ह्याम्साएर एकाउन्टेनको सहकार्य रहेको छ । साउन अन्तिमबाट सुटिङ थालिने फिल्मका लागि हाल सेट डिजाइन कार्य भैरहेको जानकारी फिल्मका निर्माता क्षितिज सुवेदी खत्रीले दिएका छन । उनले यो फिल्मको शुटिङको लागि नेपालमै पहिलोपटक रकेट निर्माणको तयारी भईरहेको खुलाएका छ्न ।