प्रिमियरमा ‘खजुरे ब्रो’ ले पायो सुखद प्रतिक्रिया

काठमाडौं ।
कमेडी जनराको फिल्म ‘खजुरे ब्रो’ को मंगलबार साँझ राजधानीमा प्रिमीयर गरियो । अबको शुक्रबार अर्थात २८ बैशाखमा देशब्यापी प्रदर्शनमा आउने तयारीमा रहेको फिल्मले प्रिमियरमा सुखद प्रतिक्रिया पाएको छ ।
सुरज सुनुवारको लेखन, निर्देशनमा बनेको फिल्मको प्रिमीयरमा फिल्मकर्मी,पूर्वमिस नेपालहरु तथा संचारकर्मीको बाक्लो उपस्थिति थियो ।

साथीभाइबीचको सम्बन्ध,पारिवारिक सम्बन्ध तथा सहकारी घोटाला र खजुरे ग्याङको इमान्दारिताको कथा प्रस्तुत गरिएको फिल्ममा रेअर राई शीर्ष भूमिकामा छन् । उनको साथमा नीति शाह,महेश त्रिपाठी,नवीन मानन्धर,सुष्मा निरौला,पुस्कर कार्की,बिनिता थापा मगर,प्रेम सुब्बा,मनिष राउतलगायतका कलाकारको अभिनय छ ।

काठमाडौंसँगै दार्जलिङ, धरान र इटहरीमा खिचिएको फिल्ममा धरानको स्थानीय कला,परिबेश र मौलिक लवजलाई बिशेष रुपमा प्रस्तुत गरिएको छ । दिव्य दृश्य इन्टरटेन्मेन्टले मान्द्रो प्रोडक्सन र मल्टी प्रपोज प्रालिसँगको सहकार्यमा फिल्म निर्माण गरेको फिल्म हेरेपछि उपस्थिति चलचित्रकर्मीले निर्देशक सुरज,अभिनेता रेअरलगायतको कामको तारिफ गरे ।

नवीन मानन्धर र सुरज सुनुवार निर्माता रहेको फिल्ममा सुनिल श्रेष्ठ, अनिल मानन्धर र पिकेश मानन्धर सहनिर्माता छन् । आरआर फिल्मसले वितरण गरेको फिल्मको कार्यकारी निर्माता डायमण्ड उप्रेती छन् । फिल्म सो मितिमा सिंगल रिलिज हुदैछ ।