‘रावायण’ को लागि एक्शन सिक्दै पल शाह

काठमाडौं ।
लभर ब्वाईको रुपमा परिचित अभिनेता पल शाह अब एक्शन अवतारमा देखिने भएका छन् । उनले आफूलाई एक्शन हिरोको रुपमा समेत स्थापीत गराउने प्रयास स्वरुप अचेल एक्शनको बिशेष ट्रेनीङ लिइरहेका छन् । खासमा उनले आफ्नो नयाँ फिल्म ‘रावायण’ का लागि एक्शन प्राक्टिस सुरु गरेका हुन् ।

उनले बिगत एक सातादेखि एक्शन डिरेक्टर श्री श्रेष्ठसँग बिशेष प्रकारको एक्शन सिकिरहेका छन् । सुदर्शन थापाको निर्देशनमा बैशाख पहिलो साताबाट छायांकन सुरु हुने तयारीमा रहेको ‘रावायण’ मा पल दोहोरो भूमिकामा प्रस्तुत हुने बुझ्नमा आएको छ । ०८१ को भदौ २१ गतेलाई प्रदर्शन मिति तोकिएको फिल्ममा पलको साथमा पूजा शर्मा छिन् ।

पूजा र सुदर्शनको संयुक्त लगानीमा निर्माण हुने फिल्ममा प्रियंका कार्की, प्रमोद अग्रहरी, निकीता चण्डक, प्रकाश शाह, कैलाश रावल, अर्जुन जगं शाही, शर्मिला मल्ल, प्रदिप ढकाल लगायतका कलाकारको समेत अभिनय रहने छ । शिवम अधिकारीको लेखन, सौरभ लामाको छायांकन, रामजी लामिछाने र बिक्रम स्वाँरको कोरियोग्राफी रहने फिल्मको उपत्यका बितरण रिच इन्टरटेन्मेन्ट र मोफसलको बितरण एफडीले गर्ने छ ।