नेटेभि र ओएसआर रियालिटीमा हमालको ‘सफलताको कथा’

काठमाडौं । 
नेपाल टेलिभिजन र ओएसआर रियालिटीबाट नयाँ बर्ष–०८१ को अवसर पारेर नयाँ रियालिटी शो ‘सफलताको कथा’ प्रशारण हुदैछ । महानायक राजेश हमालले संचालन गर्ने शोबारे शुक्रबार राजधानीमा प्रेसमिट गरि जानकारी दिइएको छ । निर्माता समृद्धि इन्टरनेशनलले शो एक सय भागसम्म निर्माण गर्ने लक्ष्य लिएको छ । हालसम्म १९ भाग तयार भइसकेको र बाँकी एपिसोड केही समयमै छायांकन गरिने जानकारी निर्माता तथा निर्देशक सुमन अधिकारीले दिएका छन् ।
बैशाख १ गतेबाट हरेक शनिबार साँझ ७ बजे नेपाल टेलिभिजनमा प्रशारणमा आउने शोका अहिलेसम्मका एपिसोडमा अमेरिका र क्यानडामा कार्यरत सफल नेपालीहरुको कथा समेटिएको बताइएको छ ।

अभिनेता हमालले बिदेशमा धेरै चुनौतीसँग संघर्ष गरेर सफलता हासिल गरेका नेपालीहरुको कथा सुन्दा र प्रस्तुत गर्न पाउदा खुशी र गर्व लागेको बताए । उनले कर्मठ,पौरखी नेपाली हातहरुको सफलताको कथा सारा बिश्वले सुन्नु पर्ने बताउदै ती कथाहरुले अरुलाई प्रेरणा मिल्ने दावी गरे । कार्यक्रमका प्रमुख अथिति बरिष्ट कलाकार मदनकृष्ण श्रेष्ठले बिदेशमा नेपालीहरुले निकै प्रगति गरेको स्मरण गर्दै यसप्रकारका शोले सबैलाई प्रेरित गर्ने राय राखे । कार्यक्रममा नेपाल टेलिभिजनका महाप्रबन्धक फूलमान वल यस्तो प्रेरणादायिक शो प्रशारण गर्न आफूहरुलाई खुशी लागेको बताए ।