निर्देशक बोहराको ‘श्री’ ०७७ को सर्वाेत्कृष्ट, ‘हेल्लो जिन्दगी’ बाट सर्वाेत्कृष्ट निर्देशक

कोरोना–१९ को त्रासका बीच करिब ७२ घण्टा ‘क्यामेरा रोल’ मा छायाँकन गरिएको सूर्य बोहरा निर्देशीत ‘श्री’ ०७७ सालको सर्वाेत्कृष्ट फिल्म घोषित भएको छ । लकडाउनका कारण सबै ब्यबसाय बन्द भइरहेको अबस्थामा निर्देशक बोहराले कलाकार तथा प्राबिधिकलाई समेत सहयोग गर्ने हेतुले निर्माण गरेको सो ‘श्री’ले गत सोमबार राजधानीमा सम्पन्न १३ औं संस्करणको डि सिने अवार्डमा सर्वाेत्कृष्ट फिल्म–०७७ को अवार्ड जितेको हो ।

फिल्म निर्देशन,लेखन,गीतकार,अभिनेता तथा समाजसेवीका रुपमा समेत परिचित निर्देशक बोहरा आफ्नो फिल्म सर्वाेत्कृष्ट भएकोमा खुशी ब्यक्त गर्छन् । एकसाथ ०७७,०७८ र ०७९ सालको अवार्ड बितरण गरिएको कार्यक्रममा निर्देशक बोहराले ‘श्री’ बाट मात्रै होइन, ०७८ मा प्रदर्शीत बिक्रम डि जोशीद्धारा निर्मित तथा अभिनीत फिल्म ‘हेल्लो जिन्दगी’ बाट सर्वाेत्कृष्ट निर्देशक जुरी अवार्ड प्राप्त गरे । सोही फिल्मबाट गायक,संगीतकार राजनराज शिवाकोटीले उत्कृष्ट गायक,प्रबिशा अधिकारीले उत्कृष्ट गायिका र सम्राट बस्नेतले सर्वाेत्कृष्ट द्धन्द्ध निर्देशकको अवार्ड जिते ।

कोरोनाको चरम भयको अबस्थामा पनि फिल्म निर्माण तथा असहाय,पीडितको सेवामा अनवरत खटेका बोहरा दर्शकको माग अनुरुपको फिल्म निर्माण गर्न आफू कहिल्यै पछि नपर्ने बताउँछन् । पछिल्लो समय प्रदर्शीत आफ्ना फिल्मले दर्शकको मनका साथै देशबिदेशमा समेत अवार्ड जितिरहेकोमा उनी निकै पुलकीत देखिन्छन् ।
उनको ‘हेल्लो जिन्दगी’ ले नेपालमा मात्रै होइन, गान्तोक इन्टरनेशनल फिल्म फेष्टिभलमा क्रिटिक्स च्वाइस् अवार्ड,रोयल सोसाइटी अफ टेलिभिजन एण्ड मोशन पिक्चर्स अवार्डमा ‘आउट स्ट्याण्डीङ्ग एचिभ्मेन्ट अवार्ड’,ब्ल्याक स्वान इन्टरनेशनल फिल्म फेष्टिभलमा ‘नाइट अफ दि रिल’,दार्जिलिङमा गोल्डेन फर्न फिल्म अवार्डस् तथा जयसालमेर इन्टरनेशनल फिल्म फेष्टिभल,राजस्थानमा उत्कृष्ट फिचर फिल्म अवार्ड,सिंगापुरको वल्र्ड फिल्म कार्निभल तथा क्यालिफोर्नीयामा सम्पन्न सन जोस इन्डिपेन्डेन्ट फिल्म फेष्टिभलमा समेत बेष्ट न्यारेटिभ फिचर फिल्म अर्वाडका साथै युकेमा सम्पन्न फिल्मजेन इन्टरनेशनल फिल्म कम्पिटीसनमा क्रिटिक्स च्वाइस अवार्ड,कल्ट जुरी फिल्म फेस्टामा बेष्ट फिचर फिल्मलगायतका थुप्रै अवार्ड जितिसकेको छ । उनी अचेल नयाँ चलचित्र निर्माणको तयारीमा जुटेका छन् । ‘दर्शकबाट पाएको माया,साथ,हौसला र प्रेरणाले अझ बढी उर्जावान बनाएको छ,’ उनी भन्छन्,‘अब छिट्टै नै नयाँ फिल्म निर्माण गर्दैछु ।’ बर्षा सकिएलगतै छायांकनमा जाने उनको नयाँ चलचित्र सस्पेन्स–रोमान्टिक जनराको हुनेछ । फिल्मको घोषणा केही सातामै गर्ने योजना उनको छ ।
 ०००