माघ ९ मा आउदैछ ‘बिगुल’,हेर्नुस् तीन फस्र्टलुक

माघ ९ गते प्रदर्शन हुने ‘बिगुल’ फिल्मको फस्र्टलुक पोस्टर आइतबार सार्वजनीक गरिएको छ । रमेश कोइरालाको निर्देशनमा बनेको फिल्मका सार्वजनीक तीन डिजाइनका पोस्टर मध्ये एउटामा अभिनेत्री बेनिशा हमाललाई सिंगल प्रस्तुत गरिएको छ । बाँकी दुई पोस्टरमा एउटामा बेनीशाका साथमा नरेन खड्का र रमेश बुढाथोकी आक्रोशीत मुद्रामा छन् । अर्काे एउटा पोस्टरमा भने प्रमुख सबै कलाकार अटाइएको छ ।

कल्पना पौडेलको प्रस्तुति अनि दिनेश कोइरालाको कथा र निर्माण रहेको फिल्मले उठाएको बिषयबस्तु र जेन्जीले उठाएको बिषय हुबहु मिलेको निर्माण पक्षले दावी गरेको छ । जबकी यो फिल्म गत बैशाख महिनामा मुर्हत गरि जेठबाट सुटिङ थालिएको थियो । जेन्जी पुस्ताले भने गत भदौ २३ र २४ गते देशब्यापी आन्दोलन गरेका थिए ।

फिल्मले उठाएको बिषय र माग जेन्जी आन्दोलनको भावनासँग मिल्न गएकोले आफूहरुले यो फिल्म जेन्जी आन्दोलनप्रति समर्पित गरेको निर्माता तथा कथाकार कोइरालाले बताएका छन् । जेन्जी पुस्ताले आन्दोलन गर्नुभन्दा ४ महिना अघिनै तिनै बिषय केन्द्रित भइ फिल्म निर्माण गरिनु अचम्मको संयोग मान्नुपर्छ ।

‘‘बिगुल’ मा हामीले उठाएको मुल मुद्धा र पछि जेन्जी पुस्ताले उठाएका माग,देश बिकास र परिवर्तनप्रति आम नेपालीको चाहनाको बिषय ठ्याक्कै मिल्न गएको छ । त्यसकारण यो फिल्म हामीले जेन्जी आन्दोलनप्रति समर्पित गरेका छौं’ कथाकार तथा निर्माता दिनेश कोइराला भन्छन्,‘फिल्मले युवा र महिलामा चेतना जगाइ भ्रष्टाचार र बिकृति उन्मुलनका लागि परिवर्तनको बिगुल फुकेको छ । आम नेपालीको समृद्ध र बिकसीत नयाँ नेपालको चाहनालाई सम्बोधन गरेको छ । जागरणको सन्देशका साथै प्रयाप्त मनोरञ्जनलाई समेत ख्याल गरिएको ‘बिगुल’ बिश्वभर रहेका नेपालीले हेर्नुपर्छ भनेर आह्वान गर्दछु ।’

निर्देशक कोइरालाले पारिवारिक,सामाजीक न्याय र राजनीतिक सचेतनाबाट जन्मिएको नयाँ मार्ग,जहाँ भुइँमान्छेहरुको सपना,संघर्ष र बलिदानीको इतिहास ‘बिगुल’ मार्फत पर्दामा लेखिएको बताउँछन् । फिल्मले स्वस्थ मनोरञ्जनका साथमा सामाज परिवर्तनका लागि आवाज बुलन्द गरेको दावी उनको छ । समाजमा महिलाले गर्नुपरेको संघर्ष र बलिदानीको पारिवारिक कथा पनि समेटिएको उनी बताउँछन् ।

म्याग्नोलिया ग्रुपको ब्यानरमा निर्माण भएको चलचित्रमा बेनिशाका साथमा नरेन खड्का,रमेश बुढाथोकी,नीर शाह,सरोज खनाल,हेमन्त बुढाथोकी,शिसिर वाङ्देल,बिनोद न्यौपाने,जेएन घिमीरे,गीता अधिकारी,मीरा पण्डित,मानश्री शर्मालगायतका कलाकारले अभिनय गरेका छन् ।

प्रदिप भारद्वाज र मौनता श्रेष्ठको पटकथा,सम्वाद,शिब ढकालको छायाङकन,कमल राई र कविराज गहतराजको नृत्य निर्देशन,एनवी महर्जनको द्वन्द्व निर्देशन,बिश्वप्रकाश शर्मा,अर्जुन पोखरेल र मनोज चौलागाईंको संगीत,तारा थापा किम्भेको सम्पादन रहेको चलचित्रको सहनिर्मातामा सूर्य कान्त कोइराला र महेश कोइराला छन् । काठमाडौं उपत्यकाभित्र काफिया फिल्म्स्ले बितरण गर्ने चलचित्रको मोफसलको बितरण श्री ब्याङ्केट्स इन्टरटेन्मेन्टले गर्ने छ ।