‘ठूली’ निर्माता पुष्कर पन्तको आयोजनामा अमेरिकामा ‘सतीदेवी’ को बिशेष शो हुदै

काठमाडौं,२७ साउन ।
लामो समयदेखि अमेरिकामा बसोबास गर्दै आइरहेका निर्माता,कलाकार तथा समाजसेवी पुष्कर पन्तको आयोजनामा चर्चित फिल्म ‘सतीदेवी’ को आउँदो शनिबार अर्थात साउन ३१ गते (१६ अगस्त) अमेरिकाको भर्जिनीयास्थित तन्दुरी फेयरफ्याक्समामा बिशेष प्रदर्शनी गरिदैछ । महिलाहरुको महान पर्व तीजको अबसर पारेर नारीहरुको सम्मानमा ‘सतीदेवी’ को बिशेष शो गर्न लागीएको जानकारी पन्तले दिएका छन् ।

Organizer Pushkar Pant

अमेरिकामा बस्दै आए तापनि कलाकारिता तथा समाजसेवामा समेत उत्तिकै सक्रिय पन्तले राष्ट्रियलगायत थुप्रै अवार्ड बिजेता चर्चित फिल्म भएकाले आफूहरुले बिशेष शो गर्न लागेको बताए । ‘‘सतीदेवी’ को धेरै चर्चा सुनेको र यसप्रकारका मौलिक अनि पारिवारिक चलचित्र अझै बन्नु र धेरैभन्दा धेरैले हेर्नुपर्छ भन्ने मान्यता स्वरुप बिशेष शो गर्ने निर्णय गरेका हांै,’ उनले भने,‘हामी जो जहाँ रहे तापनि नेपाली कला,संस्कृति,मौलिकता र आफ्नोपन बचाइराख्नका लागि हरेकले आफ्नो तर्फबाट केही न पहलकदमी लिनैपर्छ । सोही अन्तर्गत चर्चित फिल्म शो गर्न लागेका हौ ।’ एभरेष्ट सूर्य बोहरा निर्देशीत हिट फिल्म ‘ठूली’ का निर्माता समेत रहेका पन्त आफूहरु ‘सतीदेवी’ हेर्न निकै आतुर रहेको बताउँछन् ।

चलचित्र बिकास बोेर्डद्वारा आयोजीत राष्ट्रिय चलचित्र अवार्ड–०८० मा बिशेष चलचित्र पुरस्कार जित्न सफल नारी प्रधान चलचित्र ‘सतीदेवी’ ले अहिलेसम्म राष्ट्रियसहित एक दर्जन उत्कृष्ट अवार्डहरु जितिसकेको छ । लक्ष्मण सुवेदीको लेखन,निर्माण र निर्देशनमा बनेको चलचित्रमा मलिका महत,रमेश बुढाथोकी,सन्दिपबाबु लोहनी,कुलबहादुर अधिकारी,सृजना अधिकारी,बालकलाकार हर्षिका वली र मञ्जिला बानीयाँलगायतले अभिनय गरेका छन् । गोल्डेन स्टेट मुभी मेकर्स एलएलसी क्यालिफोर्नीयासँगको सहकार्यमा दिलासा कृएसनको प्रस्तुति रहेको चलचित्रको निर्मातामा दिलासा,सारा,श्रीदेवी र बिशाल सुवेदी छन् ।