‘बरिष्ट बलराम’ मा गौमायाको ठाउँमा सृजना सुब्बा

काठमाडौं ।
सुटिङ सकेर हाल हाल पोस्ट प्रोडक्सनमा रहेको फिल्म ‘बरिष्ट बलराम’ को एक प्रमुख कलाकारमा पहिला गौमाया गुरुङ अनुबन्धित भएकी थिइन् । तर, अब भने उनलाई यो फिल्ममा हेर्न पाइने छैन । निर्माण पक्षले उनलाई भनिएको भूमिकामा अर्की अभिनेत्री सृजना सुब्बालाई अभिनय गराएको छ । सुरेन्द्र पौडेलको निर्देशनमा बनेको ‘बरिष्ट बलराम’ मा सृजना दयाहाङ राईको पत्नीको भूमिकामा देखिने छिन् ।

‘बरिष्ट बलराम’ मा एकाएक गौमाया ‘आउट’,सृजना ‘इन’ किन गरियो त ? यसबारेमा भने गौमायाको डेट नमिलेकाले हेरफेर गरिएको बताइएको छ । पछिल्लो पटक रिलिज भएका गौमाया अभिनीत फिल्मले बक्स अफिसमा कमाल देखाउन नसकेको तर सृजना अभिनीत ‘अञ्जिला’ सुपरहिट भएकाले ‘बरिष्ट बलराम’ टिमले बिचार गरेरै गौमायाको ठाउँमा सृजनालाई लिएको अनुमान लगाउन भने सकिन्छ ।

लक्ष्मीपूजाको दिन अर्थात ०३ कार्तिकबाट प्रदर्शनमा आउने फिल्ममा दयाहाङ राई,बिजय बराल,समृद्धि अर्याल,पशुपति राई,माओत्से गुरुङ,प्रदिपकुमार चौधरीलगायतका कलाकार प्रमुख भूमिकामा छन् । आशिष एच तामाङ र श्रीराज कार्की निर्माता रहेको फिल्मको सुटिङ चितवन आसपासमा ३६ दिनमा सकिएको हो । निर्माण टिमले छिट्टै नै ‘बरिष्ट बलराम’ को फस्र्टलुक सार्वजनीक गर्ने योजना बनाएको छ ।