‘दान्भी’ को ट्रेलरमा पूजाको भरपुर एक्शन

काठमाडौं ।
नारी प्रधान फिल्म ‘दान्भी’ को ट्रेलर बिहीबार सार्वजनीक गरिएको छ । पूजा शर्मा र कुन्साङ बमजन अभिनीत फिल्मको करिब पौने तीन मिनेट लामो ट्रेलर एक्शनले भरिएको छ । रुपेश तामाङ निर्देशीत फिल्ममा अभिनेत्री पूजालाई एक्शन लेडीका रुपमा प्रस्तुत गरिएको छ । देव मगर र अनुप गदाल निर्माता रहेको फिल्म ७ असारबाट प्रदर्शनमा आउदैछ ।

अत्याधीक भिएफएक्स प्रयोग गरिएको ट्रेलरले दर्शकको ध्यान तान्ने देखिन्छ । पूजाले जमेर एक्शन गरेकी छिन् भने उनलाई अभिनेता कुन्साङको पनि साथ छ । रबिन थापा मगरको कथा र संजोग कुँवर राणाको पटकथा,सम्वाद रहेको फिल्म हरिबहादुर घलेले खिचेका हुन् । श्री श्रेष्ठको एक्शन निर्देशन रहेको फिल्ममा अर्जुन पोखरेल,नरेश जोगी र केदारराज नेपालको संगीत छ ।

राजधानीमा आयोजीत ट्रेलर सार्वजनीक कार्यक्रममा शीर्ष भूमिकामा रहेकी पूजाले आफूले फिल्ममा गरेको एक्शन बनावटी नभएको दावी गरेकी छिन् । उनले स्टण्टहरु सबै रियलमै गरेकाले दर्शकको रियल माया पाउने बिश्वास बढेको बताइन् । त्यसैगरी अभिनेता कुन्साङले पनि आफू यो फिल्मबाट निकै बिश्वस्त रहेको बताए ।

निर्देशक रुपेशले ‘दान्भी’ ले लेडिज एक्शन फिल्मको ट्रेन्ड बसाल्ने दावी गरे । मोफसलमा एफडी कम्पनी र राजधानीमा रिच इन्टरटेन्मेन्टले बितरण गर्ने फिल्मको केही समयअघि सार्वजनीक लभ सङले अहिले चर्चा पाइरहेको छ ।

हेर्नुस् ट्रेलर–