‘होस्टेल–३’ बन्ने, सशान गर्दैछन् निर्देशनमा डेब्यु

काठमाडौं ।
०७० मा प्रदर्शन भएको हिट फिल्म ‘होस्टेल’ को तेश्रो भाग–‘होस्टेल–३’ निर्माण हुने भएको छ । पहिलो ‘होस्टेल’ हेमराज बिसीको निर्देशनमा सुनील रावलले निर्माण गरेका थिए भने तेश्रोको निर्देशन सशान कडेँलले गर्ने छन् । लामो समयदेखि गीतसंगीत तथा म्युजीक भिडियो निर्देशनमा सक्रिय सशानले लगभग सबै स्टारलाई आफ्ना भिडियोमा अभिनय गराइरहेका छन् । फिल्म निर्देशनमा भने यसैबाट उनले डेब्यु गर्न लागेका हुन् ।
निर्माण युनीटले बुधबार फिल्मको थीम डिजाइन सार्वजनीक गरेको हो । ‘होस्टेल’ त्यही फिल्म हो,जुनबाट अहिलेका चर्चित स्टार अनमोल केसीले प्रमुख भूमिकामा डेब्यु गरेका थिए । त्यही फिल्मबाटै सलोन बस्नेत, गौरव पहाडी,प्रकृति श्रेष्ठलगायतका कलाकारले रजतपटमा दरिलो पाइला राख्न सफल भएका थिए ।

निर्देशक सशान कँडेल

सम्मान इन्टरटेन्मेन्टले आरोन क्यान फिल्मस्सँगको सहकार्यमा निर्माण गर्ने ‘होस्टेल–३’ को माधव शर्माले स्क्रिप्ट लेखिरहेको बताइन्छ । निर्देशन शासनकै कथा रहेको फिल्मको निर्मातामा भने शिसिर ज्ञवाली छन् । त्यसैगरी, शंकर कोइराला कार्यकारी निर्माता रहेको फिल्मको सहनिर्मातामा सुधा मरहठ्ठा,सुरेश कँडेल र अर्जुन सापकोटा रहेको बताइएको छ ।
‘होस्टेल’ र ‘होस्टेल रिर्टन्स’ को निर्माता सुनील रावल थिए । उनले ‘होस्टेल–३’ मा भने लगानी गर्ने छैनन् । उनी केही बर्षयता स–परिवार अमेरिका बस्दै आएका छन् । ततकाल फिल्ममा लगानी गर्ने मुडमा नरहेका रावलले ‘होस्टेल–३’ मा एउटा बिशेष भूमिकामा अभिनय गर्ने बताइएको छ । उनले ‘होस्टेल–३’ का लागि सम्मान इन्टरटेन्मेन्टलाई निर्माण अधिकार दिएका हुन् । नयाँ कलाकारको बाहुल्यता रहने फिल्म निर्माण र प्रदर्शनबारे केही समयमै बिस्तृत जानकारी दिइने प्रोडक्शन म्यानेजर यमप्रसाद ओलीले बताएका छन् ।